Стихотворения для заучивания

Стихотворения - кывбуръяс

 

 

Фольклорысь

 

Катша, катша, китш-котш.


Катша, катша, китш-котш.

Тури помечö корö.

Вурдысь кер пöрöдö.

Кöин кер кыскалö.

Ош керка лэптö.

Сизь öшинь писькöдö.

Меж пач вартö.

Сюзь пожнасьö.

Кöч кöвдум пöжалö.

Ур би видзö.

Руч дöра кыö.



Серафим Попов

Зарни паськӧмӧн пасьтасис вӧр,
Мича тугъясӧн гӧрддзасис пелысь.
Дзодзӧг мӧдӧдчис лунвывлань бӧр,
Аддзан, енэжын нюжӧдчис кöлысь.

Илля Вась

Медводдза лым.

Ывлаыс еджыд,
Ывлаыс югыд:
Усьöма небыдик лым.
Небыдик гöн кодь,
Кокньыдик тöв кодь :
Тöкöтьö му бердас инмö.
Ывлаас праздник :
Югдöма, кыпыд.
Му вылыс ойбыртiс,
Унмовсис , лöнис.
Узьö,
Шойччö.
Эшкыныс небыд,
Эшкыныс шоныд.

Пётр Бушенёв

Жонь.

Аттö дивö!
Кыдз пу вылö
Öшйис яблöк
Гöрдсьыс-гöрд.
Киöс нюжöдi
Ме сылань,
Лэбзис яблöкыс -
Кöть бöрд.
Лэбзис яблöкыс,
Он судзöд.
Недыр вöтлысян-
Дай мудзан.
Ёртъяс, висьтала
Ме гусьöн :
Татшöм яблöк
Жоньöн шусьö.
Кодыр петкöдi
Нянь крöшки,
Недыр мысти
Воис нöшта.
Пуксис матö -
Кутны позис...
Но эг вöрзьы ме,
Эг повзьöд.

Серафим Попов

Ставыс еджыд.

Тöлын ставыс еджыд!
Петö весиг вежыд!
Еджыд байдöг,
Еджыд кöч.
Лымйöн вевттьысьöм
Быд рöч.
Еджыд сьöдбöж,
Весиг сюзь,
Сэтшöм еджыд,
Быттьö юсь.

Геннадий Юшков

Выль во.

Мед эськö Выль воыс
Мойдын моз воö!
Кодлы мый колö,
Мед сідзи и лоö.

Таняöс мамыс мед
Нуöдлас карö.
Колялы мамыс мед
Ньöбас гитара.

Леналы-понпи,
А Мишалы мед
Ньöбасны ыджыджык
Велосипед.

Аслым мен колö,
Мед ог ло дыш
Гожöмнас ветлысян
Мотора пыж.

Мед эськö во гöгöр
Сулалö Выль во!
Мед эськö быдöнлöн
Колöмыс збыльмö!

Нина Куратова

Град йöрын.

Миян муным пом ни дор,
Быдтам сэнi помидор,
Салат, свеклӧ, да капуста,
Кушман, анькытш
да петрушка,
Сёркни, редис да укроп,
Сельдерей да лук-чеснок.

Эм и оз, и ӧмидз,
Сэтӧр, пелысь, льӧм,
Нӧшта уна дзоридз,
Налӧн уна рӧм.

Локтам школа йӧрӧ,
Сьӧлӧм вылад рад,
Быдтiмӧ ӧд асьным
Татшӧм мича сад!

Василий Лодыгин

Мамлöн лун.

Луныс зэв нин югыд лоис,
Тӧлыс лымсӧ оз нин гарт.
Мамлӧн ыджыд
Праздник воис,
Локтiс Войвылӧ кор март.

Мамлы шуи асывводзын:
« Уна-уна во тэ ов!»
Сетi ассьым вӧчӧм козин-
Магазинсаыд оз ков.

Батьӧ окыштiс жӧ гусьӧн,
Тайӧс аддзывлi ме, дерт.
Сыкӧд пелькӧдчам да пусям,
Талун мамным
Шойччас мед.